PASTORI DELLA BARBAGIA

RIENTRO ALL'OVILE acrilico 35x50

"Su cantu de su pastore"

Tra tinnulos e sonos
De sas belveghes mias
Chi passan pasturende a passu a passu,
Eo vivo cuntentu,
E isculto sas dulches armonias
De calchi russignolu,
Chi che a mie solu
Vivit in custas puntas d’Ennargentu.
Sutta sos pedes mios,
Bido addes profundas, buscos mannos
E lughidos errios;
E subra me su chelu a cando lìmpidu
A cando tempestosu.
Gai passo sos menzus mios annos
Liberu e corazzosu.
In sas nottes d’istiu
Cando pasturighende
In sos oros sonoros de su riu
O in punta a su monte,
Ido ispuntare pura in s’orizzonte
S’eterna amiga luna,
Chi cun ragios d’amore s’adde bruna,
Sos buscos, sos pianos
Illuminat pensosa e vagabunda;
Eo mi frimo mudu
A mirare sos astros, sa campagna,
E senz’ischire un’unda
De piantu mi enid’e de cantos
A sa rustiga e bona anima mia,
E canto solu solu.
Cussas oras serenas de silenziu
Sutta sa maestade
De sa luna ch’illuminat sa terra,
Mi dan tantu consolu
Mi faghen cara custa libertade
Mi preparan su coro a noa gherra.

Antioco Casula (Montanaru)